A bitácora de Trivium

I Encontro de Historiadores da Arte de Galicia

2007-04-27T20:07:00.000+01:00

Celebrouse esta pasada fin de semana na sede da Fundación Caixa Galicia, en Santiago de Compostela, un encontro convocado pola Asociación Profesional de Historiadores da Arte de Galicia, que serviu como punto de arranque para a análise da situación profesional do sector. Desde a organización convidóusenos a participar nunha das mesas redondas, na referida a Didáctica e Difusión do Patrimonio Histórico-Artístico, onde Trivium expuxo a súa experiencia como proxecto, no que a formación e o perfil do equipo de traballo debe ser multidisciplinar e integradora a un tempo. A nosa felicitación aos organizadores polo traballo feito e o noso apoio para próximas convocatorias que abran as portas aos profesionais a un campo de actuación tan amplo coma desaproveitado.

Inauguración oficial do Centro de Interpretación da Ribeira Sacra.

2007-05-08T16:53:00.000+01:00

Despois de varios meses de intenso traballo, por fin colleu a súa forma definitiva o proxecto de recuperación e musealización da casa prioral de San Pedro de Rocas. O edificio acolle agora o Centro de Interpretación da Ribeira Sacra, que serve de base para a posta en valor dos recursos da zona e como un eixo de desenvolvemento para o turismo cultural da comarca.

Desde este Centro procurase que o visitante coñeza e desfrute de tódolos ámbitos de interese que desde estas terras se lle ofrecen: unha visión da vida monástica que dou forma ao propio espazo de San Pedro de Rocas e a outros próximos durante séculos, unha aproximación á súa riqueza natural e unha especial atención ao patrimonio etnográfico: Festas, tradicións, oficios artesanais, música, a cultura do viño...

Aínda que non vai estar aberto ao público polo momento, agardamos que en breve poidamos publicar a noticia da chegada dos primeiros visitantes.

Novas relacionadas:

Conselleria de Innovación e Industria
La voz de galicia
La region
Cultural Sacra

Está en marcha o segundo Plan de Calidade Turística da Costa da Morte

2006-11-30T08:43:00.000Z

Onte presentáronse no Museo de Bergantiños as medidas incluídas no novo Plan de Calidade, que continúan na liña das anteriores e se poden englobar en tres eixos básicos: A creación dunha marca identificadora da oferta turística da Costa da Morte, a revalorización do patrimonio e a cooperación co sector turístico.
En canto a este último punto, as actuacións previstas inclúen xornadas de formación para os empresarios así como asesoramento personalizado para deseñar as accións específicas para cada caso, tanto para aqueles empresarios que conseguiron o distintivo de calidade na primeira fase como para aqueles que se queiran incorporar agora ó plan. Espérase con todo isto mellorar substancialmente a calidade na prestación de servizos e a formación do persoal do sector.

TRIVIUM deseña o roteiro histórico de Corcubión

2006-11-27T15:40:00.000Z

No marco das actuacións a realizar dentro do Plan de Dinamización Turística da Costa da Morte, foinos encargado o deseño e vertebración dun roteiro histórico que discorre polas rúas do Conxunto histórico-artístico da vila de Corcubión.
O roteiro histórico vai poñer en valor dun xeito atractivo e ordenado os elementos máis destacados desta interesante vila mariñeira, desde un punto de vista arquitectónico, histórico e cultural.
O traballo realizado por TRIVIUM inclúe o estudo previo e inventariado dos recursos escollidos, o deseño final do trazado, a sinalización necesaria e a edición do material gráfico para informar e orientar ós visitantes.

TRIVIUM no Concello de Poio

2006-06-30T10:42:00.000+01:00

Onte pola mañá TRIVIUM mantivo unha reunión de traballo no concello de Poio. A entidade local, mostrouse interesada no servizo de audio guías que está a desenvolver TRIVIUM para varios proxectos de posta en valor do patrimonio cultural e natural.
Trala reunión fixemos un traballo de campo polo concello e visitamos o mosteiro de San Xoán de Poio, Combarro, a ruta dos muíños de Samieira e os petroglifos de San Salvador. No momento actual, estase elaborando unha proposta concreta acorde as necesidades deste territorio, que nas vindeiras semanas se entregará ao concello para o seu visto bo.

www.betanzosmp3.es unha realidade tanxible

2006-08-16T16:40:00.000+01:00

Nestes días, subimos a páxina oficial das audio guías do Concello de Betanzos. Como tiñamos previsto a web amosa a riqueza cultural, natural e histórica da totalidade do concello de Betanzos.

O enlace é: www.betanzosmp3.es

A páxina ofrece aos visitantes a oportunidade de realizar tres rutas polo concello, dúas polo núcleo histórico e unha máis polos arredores da cidade. O usuario pode descargalas tanto en formato zip, como en podcast e reproducilas no seu mp3 no momento de realiza-la visita ou cando o desexe. Ofrécense ademais de en galego, en castelán e en ingles.

A chegada de turistas internacionais aumenta no mes de xullo

2006-08-22T17:49:00.000+01:00

Segundo os datos publicados hoxe polo Instituto de Estudios Turísticos (IET) o número de visitantes estranxeiros que visitou España no mes de xullo medrou un 3% respecto o mesmo período do ano pasado, situándose en 7,7 millóns de viaxeiros. No que vai de ano, xa son 33,3 millóns de turistas os que viñeron o Estado, algo máis do 5% do ano 2005 en estas mesmas datas.
Os seis destinos máis importantes Cataluña, Baleares, Andalucía, Canarias, Comunidade Valenciana e Madrid, por esta orde, acumularon o 90% destas visitas sendo os mercados emisores máis relevantes o británico, o francés e o alemán.
No que atinxe ao noso país, sitúase no 7º posto do ranking mensual en chegadas segundo destino principal, achegándose a Galicia un total de 229.165 viaxeiros; e ocupa o 8º lugar no ranking acumulado de xaneiro a xullo de 2006, cun total de 662.679 visitas.

Ver novas relacionadas:
Cadena Ser.
La Voz de Galicia.
El Mundo.

Novo número da revista cultural Interea

2006-09-18T10:46:00.000+01:00

A Excma. Deputación da Coruña ven de publicar nestos días un novo número, o sétimo, da súa revista Interea Visual.
O tema central deste exemplar é a comunicación cultural. Así, xornalistas, deseñadores, editores e xestores culturais reflexionan en interesantes artigos sobre as diferentes problemáticas do que é comunicar en cultura, do valor que ten, e do feito en que se está a tratar o asunto na actualidade polos diversos axentes. Neste senso, a conversa entre J.L. Estevez, D. Seixo, D. Romero e L.Álvarez, pareceunos moi interesante. ¿Como se comunica a política cultural dunha Administración ou dunha Institución Privada? ¿Cales son os sistemas e os medios destinados a que a poboación estea informada sobre as actividades culturais que se ofertan?.
O tratamento das canles de comunicación en calquera tipo de política é un tema fundamental hoxe. Este tratamento debe de partires dunha planificación estratéxica cuns programas e cunhas accións concretas, ordenadas no tempo, para a procura dos obxectivos desexados. A proliferación dos gabinetes de prensa, a profesionalización das relacións públicas son probas tanxibles desta relevancia. O dominio e a experiencia nos criterios de funcionamento dos medios de comunicación tradicionais e a utilización dos novos soportes coma webes ou blogs son aspectos que nos han de axudar a conseguir unha política de comunicación cultural eficaz.

Desestacionalizando...

2006-09-20T09:20:00.000+01:00

A Consellería de Innovación e Industria, o Consorcio de Turismo de A Coruña e a Asociación Empresarial de hospedaxe (Hospeco) firmaron na mañá de onte un convenio de colaboración para posta en marcha dunha campaña de promoción da cidade. O obxectivo desta acción, cun orzamento de 225.000 €, é o de desestacionalizar a demanda turística da cidade fóra da tempada de verán, fins de semanas e pontes.
Para ilo, un autobús itinerante percorrerá as principais cidades do Estado e de Portugal, amosando os atractivos e as potencialidades turísticas da cidade herculina.
Este tipo de acordos de colaboración entre Administracións Públicas e Privadas son estratexias a imitar sempre. Preparar plans de desestacionalización amplos, globais, intersectoriais dos destinos baseados na especialización da oferta e súa promoción permitirá unha maior rendibilidade das inversións. Esta iniciativa ademais sitúase nun marco cronolóxico apropiado, ao remate da época estival, polo que pode preverse o éxito do plan.

Bo agosto en chegada de turistas internacionais

2006-09-25T15:33:00.000+01:00

Segundo os datos da enquisa de FRONTUR correspondente o mes de agosto de 2006 elaborada polo Instituto de Estudios Turísiticos (IET), 7,6 millóns de turistas chegaron a España, o que supón un 3,3% máis que no mesmo período do ano pasado. Deste xeito, a cifra turistas internacionais acumulada nos oito primeiros meses deste ano, sitúase en 41 millóns, o que supón un incremento de case un 5% con respecto ao pasado ano.
Os seis principais destinos Cataluña, Illas Baleares, Andalucía, Illas Canarias, Comunidade Valencia e Madrid, acapararon case que o 90% das visitas cuxos mercados emisores correspondían a británicos, franceses e alemáns.
No que atinxe ao noso país, o mes de agosto pódese considerar coma excelente, se temos en conta os tráxicos acontecementos que marcaron tristemente ao noso monte durante aquel mes. Algo máis de 180.000 visitantes chegaron a Galiza, o que a sitúa no ranking estatal no posto noveno mensual, mentres que ocupa a oitava praza no acumulado dos oito primeiros meses en número de turistas. A espera de que saian publicadas as análises que a Dirección Xeral de Turismo e a propia Consellería de Industria e Innovación están a realizar, parece que afortunadamente a vaga de lumes deste mes non afectou moito o resultado final en canto a número de visitantes. Sen embargo, queda unha pregunta no aire, ¿cantos visitantes máis tiveran elixido Galiza como destino das súas vacacións se os incendios non se terán producido?

Galicia segue sendo única

2006-09-11T08:58:00.000+01:00

O conselleiro de Innovación e Industria Fernando Blanco, o director xeral de Turismo Rubén Lois e mailo xerente de Turgalicia Xesús Pereira, presentaron aos medios de comunicación o pasado venres un novo "spot" publicitario baixo o lema "Galicia segue sendo única". A nova campaña busca reforzar a imaxe do destino Galiza no resto do Estado, despois da vaga de lumes que asolaron o país no mes de agosto.
O "spot" conta cos mesmos protagonistas da primeira campaña "Galicia sí, é única" (a voz do actor Luís Tosar e a música do grupo Luar na Lubre) que foi vista por 31 millóns de persoas entre os meses de maio e xuño do presente ano. Este novo anuncio terá unha duración de trinta segundos e volve a incidir na mesma idea que o anterior: o destino Galiza conta cunha boa diversidade de recursos turísticos.
Este tipo de campañas de comunicación son, máis que necesarias imprescindibles despois dunha catástrofe coma a que nos asolou durante o mes de agosto, se queremos lograr un destino consolidado, e levar á xente unha imaxe restaurada do país.

Novas relacionadas:
- Consellería de Innovación e Industria.
- Galicia Hoxe.

Innovación e Industria destinará axudas ao sector turístico

2006-08-18T11:11:00.000+01:00

Dada a recente plaga de lumes que asolou ó país nos últimos días, a Consellería de Innovación e Industria destinará 3 millóns de euros para por en marcha unha ampla campaña de promoción e apoio aos establecementos turísticos afectados. Segundo anunciou onte o conselleiro Fernando Blanco, nunha visita aos afectados o seu departamento levará á vindeira reunión do Consello da Xunta unha proposta, consensuada co sector turístico, para financiar unha nova campaña de promoción en medios de comunicación de todo o Estado. O obxectivo final destas accións será minimizar o impacto negativo das lapas na imaxe do destino "Galicia" e manter o cremento galego no eido turístico.

Novas relacionadas:
Consellería de Innovación e Industria.
Consellería de Innovación e Industria.
Correo Gallego.
La Voz de Galicia.

TRIVIUM empeza a dirección da obra en San Pedro de Rocas

2006-07-06T10:04:00.000+01:00

Despois dun longo retraso, de case que dez meses, a empresa constructora Tuconsa leva un mes traballando diariamente na rehabilitación da Casa Prioral de San Pedro de Rocas. Onte pola mañá, tivo lugar unha visita de traballo ás obras, na que o xefe de obra Xosé Reis, informou ao director de contidos César Abella sobre o cronograma e as fases da obra de rehabilitación. Na mesma xuntanza, ambas partes planificaron conxuntamente as actuacións arquitectónicas e museográficas co fin de unificar criterios e de adecuar ambas actuacións.

Turgalicia presenta a nova campaña de promoción

2006-05-30T16:29:00.000+01:00

A nova campaña de Turgalicia para a
promoción do pais deixa tópicos e quere
promocionar Galicia a través da nosa singularidade, aquelo
distinto que temos que ofrecer. A campaña, titulada
"Galicia, si é única"

... desenvólvese a súa creatividade,
centrada nas emocións e as sensacións que só se
poden sentir ao visitar Galicia. Estes sentimentos exprésanse
por medio de palabras galegas: “Palabras únicas para
emocións únicas”.

O actor Luis Tosara> e o grupo Luar na Lubre
poñen voz e música a esta nova
campaña.

O xacobeo renova a súa imaxe

2006-05-28T12:33:00.000+01:00

O pelegrín e o selo de catro cunchas, a imaxe oficial do xacobeo por máis dunha década, finalmente foi sustituida. Unha imaxe moi avellentada que non deixaba pegada de marca, polo que era preciso unha renovación.

A Consellería de Industria e Innovación presentou onte a nova imaxe do Xacobeo. A proposta gañadora dun concurso nos que se presentaron 19 ideas, foi gañado pola compostelana Oceano Visual.

O símbolo escollido está baseado na frecha amarela, sinal do camiño que ten unha bonita historia detrás: O cura do Cebreiro, Elías Valiña, comenza a sinalizar en 1984 o Camiño de Santiago dende Francia ata Compostela, pintando frechas amarelas no chan.

Parabéns á renovación e que sirva para unha mellor promoción do noso camiño máis internacional.

O Concello de Betanzos contrata o servizo de audio guías ofrecido por TRIVIUM

2006-05-20T17:13:00.000+01:00

O Concello de Betanzos convértese deste xeito no primeiro cliente desta novedosa liña de produtos de TRIVIUM, que ofrece aos turistas un novo xeito de visitar as cidades. No momento actual non existe en Galicia quen conte co sistema de audio guías de TRIVIUM, polo que podemos considerar ao Concello de Betanzos coma un pioneiro.

A nosa proposta prevé o deseño de tres rutas que vertebren e dirixan o fluxo de turístas guiándolles pola cidade dos cabaleiros, chamándolles a atención e informándolles sobre os recursos máis importantes dela. A primeira recorrerá o casco histórico de Betanzos cun límite espacial claro: as antigas murallas da cidade. A segunda amosará ao turista a Plaza do Campo, a xudería e terminará nos paseos fluviais do Mandeo e o Mendo. A terceira será para facer co coche e levaranos a sitios coma Roibeira, Tiobre, O Pasatempo, etc.

En próximas entradas colgaremos o enderezo no que as audio guías de Betanzos estarán a disposición de todo o mundo.

Última itinerancia da exposición Jazz diálogo entre culturas no Concello de Ames

2006-04-20T11:00:00.000+01:00

Onte pola noite celebrouse no Pazo da Peregrina de Bertamiráns no Concello de Ames, o último acto de inauguración da exposición Jazz: diálogo entre culturas, comisariada por TRIVIUM estratexias en cultura e turismo e que forma parte do ciclo de exposición itinerantes organizado pola Excma. Deputación de A Coruña.
O acto o que acudiron unhas corenta persoas contou coa presenza do concelleiro de cultura e deportes do Concello de Ames, D. Xose Manuel Fernández, o alcalde de Ames, D. Carlos Antonio Fernández Castro e o deputado provincial de cultura, D. Celestino Poza.

Como colofón da inauguración, Pablo Seoane Trío ofreceu un concerto con nove temas propios que foron moi aplaudidos.

Noticias relacionadas:
Concello de Ames

TRIVIUM no Xacobeo

2006-04-12T11:28:00.000+01:00

Hoxe pola mañá TRIVIUM presentou na Sociedade Anónima de Xestión do Plan Xacobeo, o produto das Audio Guías.

TRIVIUM ofreceu unha proposta de produción e execución dunha primeira experiencia piloto que comprendería as sete etapas do Camiño en terra galega, dende O Cebreiro a Santiago, e se temos éxito ampliar o servizo a todo o Camiño.

D. Ignacio Rodríguez, xerente do Xacobeo, mostrouse moi interesado en contratar o servizo e nas próximas semanas planificamos novas reunións para concretar polo miúdo algúns aspectos do proxecto.

TRIVIUM empresa invitada ás II Xornadas de responsables de turismo de Pontevedra

2006-04-07T09:29:00.000+01:00

A empresa TRIVIUM estratexias en cultura e turismo foi invitada polo Padroado de Turismo Rías Baixas para presentar o seu produto de audio guías no marco das II Xornadas de responsables de turismo de Pontevedra.
O acto que tivo lugar na sede do Padroado, foi seguido por máis dunha treintena de responsables e técnicos de turismo de Concellos da provincia pontevedresa.

Trala presentación estableceronse contactos con varios concelleiros que tiñan intención de coñecer máis polo miudo a proposta de TRIVIUM, e no momento actual estánse a elaborar propostas concretas para istos Concellos.

Jazz diálogo entre culturas en Toques

2006-04-03T10:39:00.000+01:00

Hoxe quedou aberta ao público a exposición Jazz: diálogo entre culturas no antigo Colexio do Souto do Concello de Toques. A mostra pódese visitar en horario de mañá e tarde, os días de semana, e permanecerá no Concello até o próximo día 10 que se trasladará e inaugurará no Concello de A Baña.

TRIVIUM preséntase a dous novos concursos públicos

2006-03-31T10:24:00.000+01:00

Onte pola mañá foron entregados na Deputación da Coruña dous novos concursos públicos dentro do Plan de Dinamización Turística de Costa da Morte.
O primeiro deles tiña como obxectivo fundamental aportar un perfil turístico do visitante de Costa da Morte en tempada baixa, codificando diversa información existente nos concellos e deseñando e levando a campo unha nova enquisa na próxima Semana Santa.
O segundo deles consistía en elaborar unha diagnose sobre a accesibilidade a edificios, transportes e recursos de interese turístico para persoas con mobilidade reducida no territorio de Costa da Morte.

Próxima estación: Negreira

2006-03-24T11:34:00.000Z

A exposición "Jazz: diálogo entre culturas", comisariada por TRIVIUM, xa se encontra montada na Casa da Cultura do Concello de Negreira.

Permanecerá en ela ata o vindeiro día 31, e pódese visitar en horario de mañá e tarde. Despois da itinerancia en Negreira, desplazarémonos a Toques, A Baña e faremos unha inauguración especial na última mosta; unha grande festa de jazz no pazo da Peregrina de Bertamiráns, con música en directo a cargo de Pablo Seoane Trío.

TRIVIUM visita Narón

2006-03-21T17:12:00.000Z

Na maña de hoxe desenvolveuse o traballo de campo no Concello de Narón de cara a elaboración dun proxecto básico de ruta de sendeirismo. A visita centrouse na zona do río Xubia, declarada Lugar de Interese Comunitario pola Red Natura 2000.

Empezamos a visita polo emblemático Muíño de Xubia e seguimos río arriba polas marxes. Visitamos lugares como a Presa do Rei, o Muíño de Entrerrios, a Capela da O, o Muíño do Pedroso, as pesqueiras de Cerdeiras, e acabamos nos humedais do Pedroso.

Nos primeiros días do mes que ven, TRIVIUM entregará no Concello a súa proposta de actuación para esta ruta, caracterizada pola riqueza natural e medioambiental.

Día de reunións para TRIVIUM

2006-03-14T10:34:00.000Z

A mañá de onte estivo marcada polas reunións.
Empezamos o día ás 8:45 horas, cunha reunión de traballo co Xefe do Servizo Sociocomunitario do Concello de Narón, D. Alfonso Filgueira. Despois da presentación dos últimos productos que está a comercializar TRIVIUM, falouse da súa aplicación ó Concello e tamén de novas posibilidades de colaboración noutros eidos coma no ambicioso proxecto do "Parque temático de Aldea Nova". Nestas vindeiras semanas, TRIVIUM presentará novas propostas de actuación ao Concello.

Ás 10:30 Dna. Milagros Lantes, delegada provincial da Consellería de Cultura e Deportes da Xunta de Galicia, recibiunos no seu despacho da Coruña. Na reunión, TRIVIUM presentou unha experiencia piloto para incorporar o sistema das audio guías nos museos dependentes da Consellería no territorio coruñés. A proposta, que tivo unha boa acollida, será presentada na Consellería nos próximos días.

A mañá rematou na Excma. Deputación da Coruña, onde recollimos os Pregos Técnicos de varios concursos públicos de interese para TRIVIUM estratexias en cultura e turismo. Do mesmo xeito, tivemos reunións de traballo coa Xerencia do Plan de Dinamización Turística de Costa da Morte.

Jazz diálogo entre culturas en Laracha

2006-03-12T18:55:00.000Z

A sexta itinerancia da exposición comisariada por TRIVIUM estratexias en cultura e turismo está sendo en Laracha.
Ó acto de inauguración, ao que asistiron unha boa parte das autoridades locais encabezadas polo alcalde D. José Manuel López Varela, tivo lugar o pasado xoves.
A mostra permanecerá aberta en horario de mañá e tarde na Casa da Cultura de Laracha ata o vindeiro día 18 de marzo.